日本网民票选! 3款必买最受欢迎零食

2020-07-14

日本网站Mognavi根据网民评分，统计出三款最受当地人欢迎零食。榜首当然係「大师」，就係Häagen-Dazs麻糬系列雪糕；第二名係Chiroruchoko朱古力；第三名係芝士挞迷至爱嘅PABLO，冻食焦糖芝士布丁。三款零食都可谓平民小吃，唔需要攀山涉水，只要喺日本便利店或超市都搵到。

冠军！Häagen-Dazs麻糬系列雪糕

呢个系列「华もち」雪糕有2种味道，包括黑糖蜜黄豆同甜酱油核桃。特别之处係雪糕混入麻糬，黏度相对较强，口感非常烟韧有嚼劲。只要去Lawson、7-11、Family Mart都有佢哋嘅蹤影，不过好大机会黑糖味就好快卖晒，如果只想食黑糖味，可能就要行多几间先搵到。冇计啦，宝物沉归底。

亚军！Chiroruchoko朱古力

Chiroruchoko即係「チロルチョコ」公司，望一望个公司logo会觉得好熟口面，因为香港都有卖佢嘅朱古力，仲＄30有找。不过就冇得奖嗰款，但係食落都好有惊喜。事关香港发售嘅杂锦味有款以麻糬作馅料，口感非常有层次，即使纯朱古力款都唔腻口，以呢个价钱算值得啦！如果已经等唔切去日本买嘅朋友，或者可以去优品360、楼上、759阿信屋碰下运气。

季军！Pablo焦糖芝士布丁

Pablo係元祖级芝士挞，只要係芝士控都会识佢，好味度受到日本人公认，喺大阪心斋桥简直排晒长龙！不过今次得奖零食唔係热辣辣嘅芝士挞，反而係冻食焦糖芝士布丁。虽然唔係新鲜出炉，但仍然有香浓芝士味，而且加埋焦糖酱同饼乾碎，咬落有口感之余，三种食物加埋非常有层次！锺意焦糖布丁嘅朋友一定会觉得好惊喜。

除咗最受欢迎零食，亦有细分为头3位最受欢迎糖果、冻食食品、便利店食品。所有得奖食品都可以喺日本便利店搵到，真係方便快捷！最紧要唔驶排长龙等几个钟。

最受欢迎糖果

第一名．Chiroruchoko朱古力

第二名．森永半熟朱古力

第三名．日清坚果味饼乾

最受欢迎冻食食品

第一名．Häagen-Dazs麻糬系列雪糕

第二名．Pablo焦糖芝士布丁

第三名．井村屋cream cheese雪条

最受欢迎便利店食品

第一名．Ministop栗子味雪糕

第二名．7-11慕斯蛋糕

第三名．OK便利店芝士挞

迟啲又有复活节假，近排又有得抢平机票，mark定呢啲零食，準备去日本扫货！

上一篇：日本网民分享雪景美得像童话！
下一篇：日本网民票选「 2017最佳连锁拉麵店 」！一兰竟然只排第5